“Azercell”ə sillə kimi İTTİHAMLAR: Şirkət plagiatda və şəxsi məlumatları sızdırmaqda suçlanır

Mobil rabitə bazarında liderliyi ilə öyünən “Azercell”in növbəti loqo yeniliyi şirkəti sosial şəbəkərlərdə “hədəf taxtası”na çıxarıb.

Yenicag.az xəbər verir ki, şirkətin ötən gün xüsusi mərasimlə ictimaiyyətə təqdim etdiyi yeni loqosunun plagiat olduğuna dair ittihamların ardı-arası kəsilmir. Sosial şəbəkələrdə geniş diskussiyaya səbəb olan bu məsələ “Azercell”ə qarşı plagiatla yanaşı, digər ittihamları da üzə çıxarıb.

Bu barədə “Facebook” profilində ətraflı status paylaşan ictimai fəal Bəxtiyar Hacıyev isə “Azercell”i plagiatda, abunəçilərinin şəxsi məlumatlarını kənara sızdırmaqda və onların “cibinə girməkdə” suçlayıb:

“Azercell”in yuxarıda yazdığım həyasız oğurluqlarına, 4 milyon insanın bütün şəxsi məlumatlarını ona-buna ötürmələrinə, bu şəxsi məlumatların bütün düşmən ölkələrdə gəzməsinə və bir çox başqa səbəblərə görə “Azercell” ilə əməkdaşlıq edib, onları tərifləyənlər mənim gözümdə hansısa erməni şirkətindən 3-5 manat alıb, onları tərifləyənlərdən fərqli deyil”.

Hacıyevin paylaşdığı statusa rəy bildirən çox sayda istifadəçi də “Azercell” tərəfindən məruz qaldıqları qanunsuzluqlardan bəhs edərək, şirkətin ünvanına sərt ifadələr yazıblar.